SAHABA (RA) KA HARAM'KHORI SE BACHNA- HALAL WA HARAM KA BAYAN:

 


Bismillahirrahmanirraheem

 
SAHABA (RA) KA HARAM'KHORI SE BACHNA- HALAL WA HARAM KA BAYAN:

Hz Abu Bakr (Ra) Ka Ek Ghulaam Tha Jo Unko Kama Kar Diya Karta Tha,

Chunanche Hz Abu Bakr (Ra) Uski Kamaayi Khaaya Karte They,

Ek Din Wah Koi Cheez Laaya, Hz Abu Bakr (Ra) Se Use Tanawal Kiya,

Tab Ghulam Ne Unse Kaha

"Aapko Malum Hai Ye Kya Tha ?"

Hz Abu Bakr (Ra) Ne Daryaaft Kiya, Ye Kya Tha?

Usne Bataya

"Maine Jahiliyat Me Kisi Insaan Ke Liye Kahanat Ki Thi Aur Main Kahanat Me Maahir Na Tha Bas Maine Usse Dhoka Kiya Tha, Wah Shakhs Mujhse Mila Usne Mujhe Ye Maal Diya, Chunanche Us Maal Se Aapne Tanawal Kiya Hai"

Hz Aisha (Ra) Bayan Karti Hain Ke Hz Abu Bakr (Ra) Ne Apna Haath (Muh) Me Daakhil Kiya Aur Pet Me Maujood Har Shayy Ki Qay (Vomiting) Kar Di (Kyonki Kahanat Haram Hai Aur Usse Haasil Hone Waala Maal Bhi Haram Tha)

(Sahih Bukhari Kitab Manaqib Al Ansaar, Bab Ayyam Ul Jahiliyyah)

HARAM'KHOR KI DUA QUBOOL NAHIN HOTI:

Hz Abu Hurairah (Ra) Se Riwayat Hai Ke Rasoollullah (Sws) Ne Farmaya

"Aiy Logon Be'shaq Allah Tala Paak Hai Aur Sirf Paak Cheezon Ko Hi Qubool Karta Hai, Aur Bila'shubah Allah Tala Ne Momino Ko Bhi Wahi Huqm Diya Hai,

Chunanche Allah Ka Irshad Hai

"Aiy Rasoolon ! Paakeeza Ashya Se Khao Aur Nek Amal Karo, Yaqeenan Main Jaanta Hoon Jise Tum Karte Ho,"

Aur (Ek Dusre Maqam par Farmaya Ke)

"Aiy Imaan waalon ! Paakeeza Rizq Mese Khao Jo Hamne Tumhe Diya Hai"

Fir Aap (Sws) Ne Ek Aise Aadmi Ka Zikr Kiya Jo Lamba Safar Karta Hai Uske Baal Pur'ganda Hain, (Jism) Ghubaar Aalood Hai, Wah Aasmaan Ki Taraf Apne Haath Failaata Hai (Aur Kahta Hai Ke)

"Aiy Mere Rabb ! Aiy Mere Rabb ! Aiy Mere Rabb !"

Lekin Uska Khaana Bhi Haram Hai, Uska Peena Bhi Haram Hai, Aur Uska Libaas Bhi Haram Hai Aur Use Ghiza Bhi Haram Di Jaati Hai Toh Uski Dua Kaise Qubool Ki Jaaye"

(Muslim 1015 Kitab Uz Zakaat, Tirmizi 2989 Kitab Tafseer Ul Quran, Ahmad 7356)

HARAM MAAL SE SADQAH QUBOOL NAHIN HOTA:

Jaisa Ke Saabiqa Hadith Me Hai Ke

"Allah Tala Paak Hai Aur Sirf Paakeeza Cheezon Ko Hi Qubool Karta Hai"

Iske Elawa Ek Dusri Riwayat Me Hai

"Taharat Ke Be'ghair Namaz Qubool Nahin Ki Jaati Aur Na Hi Khyaanat (Chori, Ghasab Etc) Ke Maal Se Sadqah Qubool Kiya Jaata Hai"

(Muslim 224 Kitab Ut Taharah, Tirmizi 2989 Kitab Ul Tafseer Quran, Ahmad 8356)

In Riwayat Ki Ru Se Haram Maal Se Kiya Hua Hajj, Qurbani Aqeeqah, Masjid Ya Madarse Ki Taameer Aur Deegar Koi Bhi Neki Ka Kaam (Jo Haram Maal Se Kiya Jaaye) Qubool Nahin Hoga Aur Na Hi Uska Koi Ajr Milega

"Sadqah, Hajj, Ya Neki Ke Kisi Bhi Kaam Me Sirf Pakeeza Kamayi Hi Se Kharch Karna Chahiye Kyonki Allah Tala Sirf Paakeeza Cheez Hi Qubool Karta Hai"

(Saudi Fatawa Commettee)

"Dil Ki Safaayi Aur Dua Wa Ibaadaat Ki Qubooliyat Me Halal Khaane Ka Gahra Asar Hai Kyonke Haram Khaane Se Na tOh Dua Qubool Hoti Hai Aur Na Hi Koi Dusri Ibaadat"

(Majmua Al Fatawa 23/27 Shaikh Ibn Baaz Rh)....

MA'AASHI JEDDO JEHAD KI TARGHEEB:

Bismillahirrahmanirraheem

MA'AASHI JEDDO JEHAD KI TARGHEEB:

1- Hz Abu Hurairah (Ra) Se Riwayat Hai Ke Nabi E Akram (Sws) Ne Farmaya

"Wah ShakhS Jo Lakdi Ka Gattha Apni Peeth Par Laad Kar Laaye Usse Bahtar Hai, Jo Kisi Ke Saamne Haath Phailaaye Chaahe Wah Use Kuch De Ya Na De"

(Bukhari 2074 Kitab Ul Buyu)

2- Hz Zubair Bin Awaam (Ra) Se Riwayat Hai Ki Nabi E Akram (Sws) Ne Farmaya

"Agar Koi Apni Rassiyon Ko Sambhaale Aur Unme Lakdi Baandh Kar Laaye Toh Wah Usse Bahtar Hai Jo Logon Se Mangta Firta Hai"

(Bukhari 2075 Kitab Ul Buyu)

3- Hz Aisha (Ra) Ne Farmaya

"Rasoollullah (Sws) Ke Sahaba Apne Kaam Apne Hi Haathon Se Kiya Karte They Aur ( Zyada Mahnat Wa Mashaqqat Ki Wajah Se) Unke Jism Se (Paseene Ki) Bu Aa Jaati Thi,

Isliye unse Kaha Gaya Ke AGar Tum Ghusl Kar Liya Karo Toh Bahtar Hoga "

(Bukhari 2071, Kitab ul Buyu)

4- Ek Lambi Riwayat Me Hai Ke Ek Ansari Rasoollullah (Sws) Se Maange Aaya Toh Aapne Usse Uska Gharelu (Household) Samaan (Ek Taat Aur Ek Pyala) Mangwa Kar Use 2 Dirham Me Farokht Kiya,

Fir Wah Dirham Use Dekar Kaha

"Jao Ek Dirham Se Khana Khareed Kar Ghar Walon Ko De Do Aur Dusri Se Kulhaadi (Axe) Khareed Kar Mere Paas Le Aao "

Kuch Der Baaf Wah Kulhaadi Le Aya,

Aap (Sws) Ne Apne Haath Se Usme Lakdi Ka Dasta Thonka Aur Ansari Se Kaha

"Jao Isse Lakdiyan Kaato Aur Le Jaakar Bazaar Me Becho Aur 15 Din Tak Main Tujhe (Maanta Hua) Na Dekhun"

Aadmi (Jungal Ki Taraf) Chala Gaya Wah (Roz) Lakdiyan Kaat'ta Aur Le Jaakar (Bazaar) Me Bech Deta

Fir Jab Wah Waapas Aaya Toh Usne 10 Dirham Kama Diye They, Wah Gaya Aur Kuch Dirhamo Se Anaaj Khareed Liya Aur Kuch Se Kapda,

Fir Aap (Sws) Ne (Use Mukhaatib Karke) Farmaya

" Ye Tere Liye Usse Bahtar Hai Ke Tu Roz E Qayamat Aaye Aur Ye Sawaal Teri Peshaani Par Daagh Bana Hua Ho"

(Sahih Lagheerah: Sahih Targheeb 834 Kitab Ul Sadaqaat, Abu Dawood 1641. Ibn Majah 2198

Note: Ibn Hajar (Rh) Ne Aur Imam Tirmizi (Rh) Ne Is Riwayat Ko Hasan Kaha Hai

5- Hz Adam (As) Kheti Ka Kaam, Hz Dawood (As) Lohaar Ka Kaam, Hz Noah (As) Bhad'hai Ka Kaam, Aur Hz Idrees (As) Kapde Seene Ka Kaam Karte They,

Hz Moosa (As) Bakriyan Chaaraya Karte They Aur Hz Muhammad (sws) Tijaarat Pesha They..

To Be Continued

HARAM WA HALAL KE MUTALLIK 10 BUNIYAADI USOOL

Bismillahirrahmanirraheem

HARAM WA HALAL KE MUTALLIK 10 BUNIYAADI USOOL

1- HALAL WA HARAM QARAR DENE KA HAQ SIRF ALLAH TALA KO HAI :

Allah Tala Ka Irshad Hai

" Aiy Nabi ! Jis Cheez Ko Allah Tala Ne Aapke Liye Halal Kar Diya Hai Use Aap Kyun Haram Karte Hain ? (kya) Aap Apni Biwion Ki Razamandi Haasil Karna Chaahte Hain Aur Allah Bakhsne Wala Raham Karne Wala Hai "

(Surah Tahreem Ayat No 1)

Is Ayat Ke Shaan E Nuzool Ke Mutalliq Hz Aisha (Ra) Bayan Hai Ke Hz Zainab (Ra) Ke Ghar Shahad Piya Karte Aur Wahan Kaafi Der Rahte, Main Aur Hafsa (Ra) Ne Ye Tayy Kiya Ke Ham Mese Jis Ke Ghar Bhi Aap (Sws) Tashreef Laayen Wah Kahe Ke Aapne Shahad Piya Hai, Aapke Muh Se Iski Boo Aa Rahi Hai,

Chunanche Fir Hamne Yahi Kaha Toh Aap (Sws) Ne Farmaya

"Maine Toh Zainab Ke Ghar Se Shahad Piya Hai, Tab Aapne Qasam Utha Li Ke Main Kabhi Shahad Nahin Piyunga "

Toh Surah Tahreem Ki Ye Aayat Naazzil Hui,

Maalum Hua Ke Allah Tala Ki Halal Kardah Cheez Ko Koi Nabi Bhi Haram Nahin Kar Sakta Toh Fir Imam, Wali Aur Buzurg Ki Kya Haisiyat..

2- HALAL WA HARAM KA HAQ GHAIR ALLAH KO DENA SHIRK HAI:

Hz Adi Bin Hatim (Ra) Se Riwayat Hai Ke

"Maine Nabi Kareem (Sws) Ki Khidmat Me Haazir Hua Aur Meri Gardan Me Sone Ki Saleeb Thi"

Aap (Sws) Ne Irshaad Farmaya:-"Aiy Adi ! Is But (Yani Saleeb) Ko Phenk Do"

Aur Maine Suna Aap (Sws) Surah Taoba Ki Ye Ayat Padh Rahe They

"Unhone Apne Ulema Aur Darweshon Ko Allah Ke Siwa Apna Rabb Bana Liya"

Tab Hz Adi (Ra) Ne Arz Kiya Ke

"Aiy Allah Ke Rasool (Sws) ! (Yahood Wa Nasara Apne Ulema Ki Ibadat Toh Nahin Karte They)"

Toh Aapne Farmaya:-"Yaqeenan Wah Unki Ibaadat Nahin Karte They, Lekin Jab (Unke) Ulema Kisi Cheez Ko Halal Kahte Toh Wah Bhi Use Halal Samjhte Aur Jab Ulema Kisi Cheez Ko Haram Kahte Toh Wah Bhi Use Haram Samjhte (Allah Ke Siwa Ulema Ko Rabb Banaane Ka Yahi Matlb Hai Kyonki Halal Wa Haram Ka Ikhtiyaar Sirf Allah Taala Ko Hai Aur Jab Ye Akhtiyaar Kisi Aur Ko De Diya Jaye Toh Ye Use Rabb Banaane Ki Hi Mutraadaf Hai)

(Sahih Tirmizi 3095, Kitab Tafseer Ul Quraan, Bab Man Suratul Tauba)

3- ALLAH TALA NE TAMAM HARAM ASHYA KI TAFSEEL BAYAAN FARMA DI HAI

Allah Taala Ka Irshaad Hai

"Aur Allah Ne Tum Par Jo Haram Kiya Hai Uski Tafseel Tumhare Liye Bayaan Kar Di Hai"

(Surah Anaam Ayat 119)

Sheikh Ul Islam Imam Ibn Taimiyyah (Rh) Is Ayat Ke Zamar Me Farmate Hain Ke

"Yahan Muraad Tabbiyeen Aur Tauzee Hai"

Yani Allah Tala Ne Tamam Haram Ashya Ki Wazahat Farma Di Hai Lihaaza Jis Cheez Ki Hurmat Ki Wazaahat (Kitab Wa Sunnat Me) Maujood Nahin Wah Haram Nahin Wah Halal Hai Kyonki Ashya 2 Tarah Ki Hi Hain "Haram Aur Halal"

(Majmua Al Fatawa 21/536)

4- JIN ASHYA KI HILLAT WA HURMAT KI WAZAAHAT NAHIN WAH BHI MUBAAH HAIN:

Farmaan E Nabawi Hai

"Jise Allah Tala Ne Apni Kitab Me Halal Qaraar Diya Hai Wah Halal Hai, Aur Jise Haram Qaraar Diya Hai Wah Haram Hai, Aur Jiske Mutaalliq Khamoshi Akhtiyaar Farmaayi Hai Wah Dar'ghuzar (Ki Hui Ashya Me Se Hai) Pas Tum Allah Ki Dar'ghuzar (Ki Hui) Cheezon Ko Qubool Kari,

Fir Aap (Sws) ne Ye Aayat Tilaawat Farmaayi

"Aur Tera Rabb Bhoola Hua Nahin"

(Sahih Silsila Us Sahiha 2256, Ibn Majah 3366, Tirmizi 1726)

5- NEK NIYAT HARAM KO HALAL NAHIN BANAATI:

Maslan Agar Koi Shakhs Masjid Ki Taameer Ki Niyat Se Rishwat Le Ya Jua Khele Toh Ye Kaam Halal Nahin Honge, Balke Haram Rahenge, Kyonki Allah Taala Paak Hai Aur Paakeeza Cheezein Qubool Farmaata Hai

(Muslim 1015 Kitab Us Zakaat, Tirmizi 2989 Kitab Tafseer Ul Quraan, Ahmad 7356)

6- KISI QISM KE HEELE SE BHI HARAM HALAL NAHIN BANTA:

Jaisa Ki Yahood Par Murdaar Ki Charbi Haram Thi Magar Unhone Use Pighla Kar Oil Banaya Aur Fir Use Bechkar Qeemat Kha Li Aur Yun Haram Charbi Ko Halal Banaane Ka Heela (Bahana) Kiya,

Islam Ne Is Heele Ko Qubool Nahin Kiya Aur Nabi (Sws) Ne Unke Haq Me Bad'dua Farmayi Ke

"Allah Tala Yahood Ko Gharat Kare, Yaqeenan Allah Taala Ne Unpar Murdaar Ki Charbi Ko Bhi Haram Kiya Tha (Lekin) Unhone Use Pighlaaya Fir Use Farokht Kiya Aur Uski Qeemat Kha Gaye"

(Bukhari 2236 Kitab Ul Buyu, Muslim 1581, Abu Dawood 3476)

Isi Tarah Agar Koi Rishwat Ka Naam Tohfa Aur Sood Ka Naam Munaafa Rakh Kar Heela Kare Toh Haram Halal Nahin Hoga ; Jaisa Ke Aaj Koshish Ki Ja Rahi Hai,

Nabi (Sws) Ne Uske Mutalliq Pahle Hi Pesh'goi Farma di Thi Log Haram Ashya Ka Naam Badal Kar Unhe Halal Banaane Ki Koshish Karenge, Lekin Dar'haqeeqat Haram Ki Honge

Chunanche Farman E Nabawi Hai

"Meri Ummat Ka Ek Giroh Zaroor Sharaab (Wine) Ka Naam Badal Kar Use Halal Bana Lega"

(Silsila Us Sahiha 90, Sahih Jame Sagheer 5453, Abu Dawood 3688)

7- HARAM KA ZARIYA BANNE WAALI
HAR CHEEZ HARAM HAI:

kyonki Sharai Nusoos Ko Saamne Rakhte Hue Ahle Ilm Ne Ye Qaayeda Muqarrar Kiya Hai Ke

"Wasail Wa Zaraaye Ka Wahi Huqm Hai Jo Maqaasid Ka Hai (Yani Agar Maqsad Haram Hai Toh Us Tak Pahunchne Wale Har Zariye Ka Huqm Bhi Haram Ka Hi Hoga)"

(Tafseer Ilm Ul Fiqah Az AbdullaH Ibn Yousuf Page 2/58)

8-HARAM SAB PAR SAB JAGAH HARAM HAI:

Yani Jab Koi Cheez Shara'an Haram Saabit Ho Jaaye Phir Ameer Ghareeb, Arabi Ajami, Aaqa Ghulaam Aur Gore Wa Kaale Ki Tafreeq Ke Be'ghair Sab Par Wah Cheez Ek Jaisi Hi Haraam Hogi,

Isi Tarah Haram Cheez Haram Ki Rahegi Khwah Koi Shakhs Balad E Islaamiya Me Ho Ya Balad E Kufr Me,

Islam Ne Haram Halal Ke Baare Me Adal Ko Malhooz Rakha Hai,

Iski Ek Misaal Wah Riwaayat Hai Jisme Ye Farmaan E Nabawi Mazkoor Hai Ke

"Agar Fatima Binte Muhammad (Sws) Bhi Chori Karti Toh Main Uske Haath Kaat Deta"

(Bukhari 4304 Kitab Ul Magazi, Abu Dawood 4373, Ibn Majah 2547, Tirmizi 1430 )

9- MAJBOORI ME HARAM HALAL HO JAATA HAI:

Allah Tala Ka Irshad Hai

"Allah Tala Ne Un Ashya Ki Tafseel tumhe Bata Di Hai Jinhe Tum Par Haram Kiya Hai Magar Wah Bhi Jab Tumhe Shakht Zaroorat Padh Jaaye Toh Halal Hai"

(Surah Anam Ayat 119)

Aur Ek Maroof Qaayeda Bhi Isi Buniyaad Par Banaya Gaya Hai Ki

"Zarooratein Haram Ashya Ko Halal Bana Deti Hain"

(Usool Fiqh Al Manhajj Ahle Hadith Page 134)

10- MAJBOORI ME UTNA HI HARAM HALAL HOTA HAI JITNE SE MAJBOORI KHATAM HO JAAYE:

allah Tala Ka Irshaad Hai

"Fir Jo Majboor Ho Jaayen Aur Wah Hadh Se Badhne Waala Aur Zyadati Karne Wala Na Ho Toh Uspar (Haram Ashya) Ke Khaane Me Koi Gunaah Nahin"

(Surah Baqarah 173)

Is Ayat Kareema Me Maujood Lafz "Wala Aad" Zyadati Karne Wala Na Ho,

Ke Mutaalliq Ahle Ilm Ka Kahna Hai Ke Aztaraari Haalat Me Jitni Miqdaar Me Uske Liye Haram Khaana Jayez Hai Us Miqdaar Se Tajawuz Na Kare.

(Tafeer Sa'adi 1/214)

Yani Majboori Me Wah Sirf Utna Hi Haram Khaana Kha Sakta Hai Jitne Se Majboori Khatam Ho Jaaye, Usse Zyada Khana Ba'dastoor Haram Hi Rahega,

Isi Buniyaad Par Ahle Ilm Ne Ye Dastoor Muqarrar Kiya Hai Ke

"Ba'waqt E Zaroorat Utne Haram Par Hi Iktafa Kiya Jaaye Jitne Se Zaroorat Poori Ho Jaaye"

(Ilm Usool Fiqah 3/65)

To Be Continued.....

RIZQ AUR QISMAT:

Bismillahirrahmanirraheem

RIZQ AUR QISMAT:

Rizq Sirf Allah Ke Haath Me Hai, Wah Jise Chaahta Hai Kam Deta Hai Jise Chaahta Hai Zyada,

Rizq Me Kami'beshi Me Allah Ki Taraf Se Insaan Ki Aazmaish Hoti Hai,

Lihaaza Jise Rizq Me Faraakhi Naseeb Ho Wah Allah Ka Ba'kasrat Shukr Ada Kare Aur Jise Tangi Ho Wah Sabr Kare Aur Sirf Allah Tala Hi Se Rizq Ka Sawaal Kare, Har Haal Insaan Ki Umar Ke Saath Saath Uska Rizq Bhi Muqarrar Hai.

Chunanche Ek Riwaayat Ke Mutaaabik Jab Insaan Abhi Apni Maa Ke Pet Me Hota Hai Uski Umar, Rizq Aur Nek Hoga Ya Bad Likh Diya Jaata Hai

(Sahih Jame Sagheer 1543 , Abu Dawood hadith No 4708)

Aur Jo Rizq Qismat Me Likh Diya Gaya Hai Fir Wah Muqammal Milkar Hi Rahta Hai, Usme Kuch Bhi Kami Nahin Hoti

Chunanche Farmaan E Nabawi Hai

"Koi Nafs Bhi Us Waqt Tak Nahin Marr Sakta Jabtak Uska Rizq Poora Na Ho Jaaye"

(Sahih Jame Targheeb 1702, Silsilatus Sahiha 2866)

Lihaaza Jab Ye Baat Taiy Hai Ke Har Ek Ka Rizq Muqarrar Hai Toh Fir Rizq Ki Justazu Me Deeni Wajibaat (Namaz, Roja, Hajj Etc) Me Kisi Qism Ki Kotaahi Nahin Karni Chahiye Aur Na Hi Bachhon Ko Deeni Taaleem Se Door Rakhna Chahiye Us Niyyat Se Ke Bacche Deen Padhenge toh Maali Mushkilaaat Ka Saamna Karenge Aur Docter ;Engineer Etc Banenge Toh Unka Mu'aashi Mustaqbal Roshan Hoga Etc Etc

RIZQ ME FARAAKHI KE NUSKHE:

Allah Taala Ka Irshad Hai

"(Hz Nooh (As) Ne Apni Qaum Ki Shikaayat Karte Hue Allah Tala Se Arz Kiya Ke) Maine Kaha Ke Apne Rabb Se Istaghfaar Karo Wah Yaqeenan Bada Bakhsne Waala Hai, Wah Aasmaan Ko Khoob Barasta Hua Chhod Dega, Aur Tumhe Khoob Pe'darpe Maal Aur Beton Me Taraqqi Dega Aur Tumhe Baghaat Dega Aur Tumhare Liye Nahren Nikaal Dega"

(Surah Nooh Ayat 10-11)

Hz Hasan Basri (Rh) Ke Mutaalliq Marwi Hai Ke KisI Ne Unse Aakar Qahat'saali (Drought) Ki Shikaayat Ki Toh Unhone Use Astaghfaar Ki Talqeen Ki, Kisi Dusre Ne Fakr O Faaqa Ki Shikaayat Ki Unhone Use Bhi Yahi Nuskha Bataya, Ek Aur Ne Apne Baagh Ke Khusak Hone Ka Shikwa Kiya Unhone Use Bhi Farmaya, Ashtaghfaar Kar,

Ek Ne Kaha - Mere Ghar Aulaad Nahin Hoti, Use Bhi Kaha Apne Rabb Se Astaghfar Kar, Kisi Ne Jab Unse Kaha Ke Aapne Astaghfaar Hi Ki TalqeeN Kyon Ki ?

Toh Aapne Yahi Ayaat Tilaawat Karke Farmaya Ke Maine Apne Paas Se Ye Baat Nahin Ki, Ye Wah Nuskha Hai Jo In Sab Baaton Ke Liye Allah Tala Ne Batlaaya Hai

(Tafseer Ahsanul Bayan)

2- SULAH'RAHMI KARNA:

farman E Nabawi Hai

" Jo Shakhs Pasand Karta Hai Ke Uske Rizq Me Faraakhi Ki Jaaye Ya Uske Asraat Der Tak Rahen Wah Sulaah Rahmi Kare"

(Bukhari hadith No 2067, Kitabul Buyu)

Ye Riwayat Ba'zaahir Us Sharai Haqeeqat Ke Khilaaf Malum Hoti Hai Ke Allah Tala Ne Har Insaan Ka Rizq Aur Umar Pahle Se Muqarrar Kar Rakhi Hai,

Lekin USKA Jawab Ye Diya Hai Ke Allah Tala Ne Ye Bhi Likha Hai Ke Jo Rizq Me Faraakhi Aur Umar Me Izaafe Ke Asbaab Apnaayega Uske Liye In Dono Me Izaafa Bhi Kar Diya Jaayega,

Yani Agar Koi Sulaah'rahmi Karega Toh Yaqeenan Isse Use Maamlaat Me Barqat Aur Qalbi Itminaan Naseeb Hoga Aur Qalbi Itminaan Use Be'shumaar Pareshaanion Se Nijaat Dilaaye Rakhega...

To Be Continued...

HALAL WA HARAM KI PAHCHAAN:

 

Bismillahirrahmanirraheem

 

HALAL WA HARAM KI PAHCHAAN:

Halal Wa Haram Ki Pahchaan Bahut Zaroori Hai, Aur Ye Wah Buniyaadi Ilm Hai Jise Haasil Karna Nabi Akram Sallalaho Alaihi wasallam Ne Har Musalman Par Farz Qarar Diya Hai

(Mishqaat 217, Ibn Majah 224)

Nez Quran Ki Aayaat Me Halal Wa Paakeeza Rizq Khaane Ka Huqm Diya Gaya Hai Jaisa Ke Farmaya

" Logon ! Zameen Me Jo Halal Aur Paakeeza Cheezein Hain Unhe Khaao"

(Surah Baqarah 168)

Ek Dusre Maqam Par Farmaya

"Allah Tala Ne Jo Tumhe Halal Aur Pakeeza Rizq De Rakha Hai Use Khao Aur Allah Ki Nemat Ka Shukr Ada Karo"

(Surah Nahal Ayat 114)

Aur Farmaya Ke

" aiy Imaaan Waalon ! Paakeeza Rizq Mese Khao Jo Hamne Tumhe Diya Hai"

(Surah Baqarah 176)

Ek Aur Aayat Me Hai Ke Paighambaron Ko Bhi Pakeeza Aur Halal Ashya Khaane Ka Huqm Hai

"Aiy Rasoolon ! Paakeeza Ashya Se Khao Aur Nek Amal Karo, Yaqeenan Main Jaanta Hoon Jo Tum Amal Karte Ho"

(Surah Muminoon Ayat No 51)

Maalum Hua Ki Halal Khaana Aur Haram Se Bachna Zaroori Hai Aur Ye Tab Hi Mumkin Hai Ke Halal Wa Haram Ki Pahchaan Ho, Lihaaza Aage Ke Post Me Chand Nuqaat Ki Roshni Me Halal Wa Haram Ki Pahchaan Karaayi Jaayegi... InSha Allah...

Mulaheza Farmaayen

HALAL KA MAFHOOM AUR PAHCHAAN KA TAREEQA:

Halal Wah Hai JIS ke Mutaalliq Insaan Khud Mukhtaar Hai, Yani Is Par Uske Karne Ya Na Karne Ki Koi PabandI Nahin Balke Use Ijaazat Hai Ke Chaahe toh Wah Kaam Kar Sakta Hai,

Maslan Khaane Me Daal Khaaye Ya Na Khaaye, Sabzi Khaaye Ya Na Khaaye, Sair O Tafree Karne Ya Na Kare Etc Etc..

Ye Uski Khwaahish Par Mauqoof Hai,

Halal Ashya Ki Pahchaan Ke Mukhtalif Tareeqe Ahle Ilm Ne Zikr Farmayen Hain,

Mulaheza Farmayye

1- " Aur Ahle Kitab Ka Khaana Tumhare Liye Halal Hai"

(Surah Maida Ayat No 5)

2- Kitab Wa Sunnat Me Adam E Ism ( Koi Gunah Nahin), Adam E Janah (Koi Gunah Nahin), Aur Adam E Harj (Koi Harj Nahin) Ke Alfaaz Ke Saath Kisi Kaam Ki Ijaazat Di Gayi Ho,

Jaise Majboor Shakhs Ke Liye Haram Ke Halal Hone Ka Zikr In Alfaaz Me Farmaya

"Fala Isma Alaihi"

Trans: "Is Par Koi Gunah Nahin"

(Surah Baqara 173)

Iddat Waali Aurton Ko Ishaare Kanaaye Se Nikah Ke Mutaalliq Baat Karne ki Hillat Ka Zikr In Alfaaz Me Farmaya

" La Junaaha Alaikum"

Trans : "Tum Par Koi Gunaah Nahin"

(Surah Baqara 235)

Aur Is Baat Ka Zikr Karke Majoor Logon Ka Jihaad Par Gaye Hue Sahaba Ke Gharon Se Khana Halal Hai,

In Lihaaz Me Farmaya

"Laisa Alal Aa'maa Harajun"

Trans: " Andhe (Aur Majoor Hazraat Par) Koi Harj Nahin"

(Surah Noor 61)

3- Kitab Wa Sunnat Me Jis Cheez Ke Halal Ya Haram Hone Ka Zikr Na Ho Wah Bhi Halal Hai, Jaisa Ki Uski Daleel Aage Post Me Aayengi..

HARAM KA MAFHOOM AUR PAHCHAAN KA TAREEQA:

Haram Wah Hai Jisse Himmati Taur Par Quran Wa Sunnat Me Bachne Ki Taeed Ki Gayi Hai, Jiska Karne Waala Gunahgaar Aur Taarak Ajr Wa Sawaab Ka Mustahiq Thaherta Hai, Iske Pahchan Ke Bhi Mukhtalif Tareeqe Hain, Mulaheza Farmaiyye

1- Kitab Wa Sunnat Me Jis Cheez Ke Haram Hone Ki Sarahat Ho Jaise

"Tumpar Murdaar (Khana) Haram Qarar Diya Gaya Hai"

(Surah Maida Ayat 3)

2- Kitab Wa Sunnat Me Jis Cheez Ke Halal Na Hone Ka Zikr Ho Jaise

"Kisi Musalman Aadmi Ka Maal Uski Dili Khwaahish Ke Be'ghair Halal Nahin Hota"

(Arwa Ul Ghaleel 5/281, Baiheqi 6/97)

3- Quran Wa Sunnat Me Jis Cheez Se Himmati Taur Par Roka Gaya Ho Jaise

"Jhooti Baat Se Bacho"

(Surah Hajj Ayat 30)

4- Kitab Wa Sunnat Me Jis Fa'al Ke Artikaab Par Saza Ka Zikr Ho Jaise

" Jo Log Nahaq Zulm Se Yateemo Ka Maal Kha Jaate Hain, Wah Apne Pet Me Aag Hi Bhar Rahen Hain Aur Anqareeb Wah Dojakh Me Jaayenge"

(Surah Nisa Ayat 10)

Note: Yahan Ye Usool Bhi Yaad Rahe Ke Nabi Akram Sallalaho Alaihi Wasallam ne Koi Bhi Haram Kaam Nahin Bataya Ke Ye Haram Hai, Balke Zabaan Se Hi Uski Hurmat Ki Wazaahat Farma Di...

To Be Continued....